Gjykata Themelore në Pejë i ka caktuar masën e ndalimit edhe për 48 orë të tjera dy të dyshuarve për rastin e sulmit ndaj kryetarit të Pejës, Gazmend Muhaxheri.
Këtë për KALLXO.com e ka konfirmuar për KALLXO.com Elzana Kastrati, zëdhënëse e Gjykatës në Pejë.
“Gjyqtari i procedurës paraprake, pas mbajtjes se seancës dëgjimore, të pandehurve iu ka caktuar masën e ndalimit edhe për 48 orë, deri në marrje të vendimit lidhur me kërkesën për caktim të masës së paraburgimit” – ka thënë Kastrati.
Prokuroria ka kërkuar caktimin e masës së paraburgimit ndaj dy të dyshuarve për sulmin fizik ndaj kryetarit të Pejës, Gazmend Muhaxheri.
Prokurorja e rastit, Arlinda Nallbani Gacaferri, ka konfirmuar para mediave se si bazë është përmendur ndikimi te dëshmitarët, mundësia e përsëritjes së rastit dhe rreziku i arratisjes.
“Prokuroria Themelore në Pejë në afatin e saj ligjor ka bërë kërkesën për masën e paraburgimit ndaj të dyshuarve. Kërkesa është bazuar në tri fazat që janë paraparë në kodin e procedurës penale si është rreziku i arratisjes, ndikimi në dëshmitarë sepse në vendin ku ka ndodhë ka shumë dëshmitarë dhe ende një pjesë nuk janë intervistuar. Dhe pastaj ekziston edhe rreziku se të njëjtit mund ta përsërisin veprën penale për vetë faktin se shtëpia e të dëmtuarve dhe të dyshuarve nuk është shumë në largësi të madhe.