Një videomaterial i publikuar gjatë debatit “Jeta në Komunë” në Kuvendin Komunal të Dragashit më 29.09.2024 shfaqi problemet e rinovimeve në Qendrën e Mjekësisë Familjare në fshatin Bresanë.
Reportazhi i ekipit të KALLXO.com tregonte pamjet se pas kryerjes së renovimeve në këtë institucion ishte shfaqur problemi me ujin i cili kishte dëmtuar një pjesë të një muri.
Tash, dy javë më pas, nga Komuna e Dragashit kanë njoftuar ekipin e KALLXO.com se problemi është rregulluar.
Në një fotografi të dërguar nga qeverisja komunale shihet se pamja në murin e QMF-së ka marrë pamje tjetër.
QMF Bresanë – Dragash, foto: Komuna Dragash “Ky objekt ka pasur problem me sistemin e ujit i cili është rregulluar deri në njëfarë mase. Ka fillu problemi i siç i themi ne vllagës në pjesë të ujit, nuk dihet a është problemi i një gypi edhe ka fillu ajo ngjyra ose lymja që ka ndodhë gjatë rinovimit prapë me humb atë shkëlqimin ose me fillu me u dëmtu. Kjo QMF ka nevoja tjera, ka nevojë për mirëmbajtje më të mirë, ka nevojë për staf shtesë dhe për organizm të punës ose rritje të cilësisë së shërbimeve” – deklaroi në terren Endrit Piraj, ushtrues detyre i drejtorit të QKMF-së në Dragash.
Për problemin e lagështisë në muret e kësaj QMF-je, kryetari i Dragashit, Bexhet Xheladini thoshte se është punë që mund të kryhet shumë shpejt.
‘Këto janë punime të vogla, me 10 euro investim ajo mundet me u rregullu. Unë tash për herë të parë po e shoh’ – deklaroi Xheladini në ‘Jeta në Komunë’ më 29.09.2024.
https://kallxo.com/kallxopernime/si-i-shkuan-bexhet-xheladinit-te-dragashit-projektet-qe-i-promovoi-ne-rrjete-sociale/
Bexhet Xheladini i LDK-së në Dragash, në debat u përball me pamjen e tualetit në Qendrën Kryesore të Mjekësisë Familjare.
Asamblisti Nexhmidin Sejdilar shfaqi një fotografi të toaletit në Emergjencën e QKMF-së, tualet i thyer.
‘Ne folëm për Shëndetësinë por kështu duket tualeti në QKMF-në e Dragashit, në Emergjencë. Një Drejtor që toleron kësi banjo a mundet me qenë i suskesshëm dhe Shëndetësia a mundet me qenë në rregull?” – deklaroi Sejdilar në ‘Jeta në Komuna’.
Edhe për këtë problematikë, nga qeverisja komunale e Dragashit, më 13.10.2024 kanë dërguar fotografi në KALLXO.com në të cilat shihet se tualeti është rregulluar.
